بكائية الوطن المقتول عمدا(شعر)

انا لا ادعّي السياسه ولا الشعر
من الاشياء الممله في حياتي دكان ود البصير...واركان النقاش السياسي بالجامعات والمدارس وادعاء الوعي السياسي بمركبات المواصلات الداخليه
لا السياسه ,, ولا الشعر....ولكن..
في بعض الاحيان تخرج هذه الاشياء رغما عنا..مثل القيء..او نبتلعها رغما عنا علقما يداوي حالة الشعور بالغثيان
يشعر الواحد منا احيانا بشعور يحسبه شعرا ..فليعذرني من يوافقني الراي..فانا كتبت باكيا بقايا اشلاء الوطن المقتول عمدا مع سبق الاصرار والترصد(فردوس السودان المفقود)
النص
يااااااا بلد اذنك
ابكيك في حزنك
دايرك تكون مني
داير اكون منك
داير ادفنك جواي
عارفك ولكنك
كتلوك وتابعنك
ما كانوا قاصدنك

فلنفترض خوفا
موتك قضاء وقدر
كتلك وما قاصد
الكاتل اتعذر
جرعة بنج زادت
دايرك تنوم اكتر
شريانك اتفجر
وكان العمر اقصر

جواي ضريح مركون
خلي اليكون مايكون
لو الضريح بيشيل
اميالك المليون
داير اسكنك جواي
وانا بالحزن مسكون
اديني بس اذنك
انا من امس مغبون

لو فيك رمق قول لى
لو كان بامكانك
ديل لسه حابسنك
عمرك وعثمانك
بي حجة التشريح
حابسنو جثمانك
شايفين اذي التجريح
في كل اركانك

باعوك وانسانك
سلفاك وعرمانك
باعوك للتهويد
بي ابخس اتمانك
ديل باعوا تاريخك
ماراعوا ازمانك
كانو ما كان فيك
كانو ما كانك

ملعون ابو التبرير
بي اسلمه وتنصير
ملعون ابو التبرير
بي حجة التحرير
مين اللي قال اصلا
دولة عرب لا غير
مين اللي ادي الزنج
دون العرب تخيير

مافيش امام صادق
وين اصلا الامة
كل من علا سرجك
كان فاقد الذمة
الليلة شتر القول
والناقصه تنتمّ
اديني بس اذنك
اديني منك عود
داير اشتلك جواي
امكن تقوم وتعود
انبت اقوم تاني
فردوسك المفقود
وبي نيلك الجاري باقي
الامل موجود
(هبشه اخيره)
تعالوا نشوف نهايتا اصلها بايظه بايظه خليهم يشرطوا خريطة السودان ويفكوها عكس الهوا تقوم الصباح تلقى ولاية الجزيرة ملصقه مع استراليا..

ينساق مني القول جبرا واعترافا مني بعبقرية كلماتك والتي هي بمثابة رثاء للوطن نهنىء انفسنا بمناسبة اكتشاف موهبة شعرية فزه داخل اخونا معز ... بالجد اي كلمة كتبت في هذه المرثية داله علي معني حقيقي لما آل اليه الوطن .
التحية لك اخي معز ومذيدا من الابداع
ابوحسام - عمر عبد المحمود