رسوم رخصة فنية(منقول)

--------------------------------------------------------------------------------

رسوم رخصة فنية

إنتفض المدير العام للهيئة القومية للجبايات بينما كان جالساً داخل مكتبه يقوم بقراءة صحف الصباح وهو يقرأ إستطلاعاً فى إحدى الصحف الفنية يفيد بأن الفنانين الشباب يفضلون ركوب العربات الفاخرة من ماركة الهمر فقام على الفور بالإتصال بمدير مكتبه طالباً منه إستدعاء مستشار الهيئة لشئون الإبتكار الذى لم تمض دقائق معدودة حتى كان يقف أمامه :
----------------------------------------------------------------
- بالله يا عبدالمنتقم أدعو ليا كل الهيئة القومية لشئون الجبايات لإجتماع عاجل ومهم بكرة الساعة عشرة.
- حاضر سعادتك لكن بس ممكن أعرف السبب ؟
- وهو يناوله الصحيفة : كدى أقرأ الإستطلاع العاملنو ناس الجريدة ده !
- يمسك بالصحيفة يقرأ ثم : والله سعادتك أنا ما عارف دى فاتت علينا كيف ؟
- طبعن لازم تفوت عليكم عشان إنتو بس مركزين ليا فى ستات الشاى والبياعين المتجولين !
الإجتماع :
إفتتح المدير العام للهيئة القومية للجبايات الإجتماع وبعد أن قام بتنوير الأعضاء وتوزيع صورة من الإستطلاع الذى فى الصحيفة على كل عضو منهم خاطبهم قائلاً :
- طبعن يا جماعة إنتو عارفين سعينا الحثيث فى إستنباط مختلف الجبايات من المواطنين من أجل تخفيف العبء على جيب المواطن وكمان إنتو عارفين برضو إنو الدولة ما عندها أى شئ تعتمد عليهو فى تسيير أمورها غير الجبايات دى .. يعنى الدولة مفروض تبنى مدارس .. طيب من وين؟ تعمل مستشفيات ... طيب من وين؟ تعمل طرق ... طيب من وين؟ توفر أمن ... طيب من وين؟؟؟ تنهب؟؟ ما لازم تكون فى مصادر دخل اللى هى الجبايات دى .. يمسك بالصحيفة أنا الليلة جبت ليكم مصدر من مصادر الجباية يعتبر كنز .. كنز عديل كده .. وأظنكم قريتو الإستطلاع النازل فى الجريدة الإتوزع عليكم ده !
- صوت : بتاع الفنانين ده!
- ايوه بتاع الفنانين الملو البلد ديل .. ديل بقوا كتيرين والواحد يوم يومين وتلاقى الحفلة بتاعتو بى كم مليون وتلاقيهو ما عندو أغنية واااحدة ! وكمان راكب ليهو همر !!
- صوت : لا والله كان كده تعبو معانا.
- لا ،والفنانين كوم والفنانات كوم تانى .. الواحدة تبداها ليك من الغنا فى بيوت الطهور والسماية وبعد شوية تلقى أيدينا ورقبتا معنكشات بالدهب !! وتسأل منها يقولوا ليكا وين ؟؟ حاكم شمال أريزونا رسل ليها زيارة عشان مبسوط منها !!
- أها يا ريس .. نخفف العبء على جيب الفنانين ديل كيف؟
- تسألونى أنا ومعاكم الدكتور عبدالمنتقم؟ مستشار شئون الإبتكار ؟ يلا يا دكتور ورينا رؤيتكم الشاملة فى الموضوع ده !
- طيب بسم الله الرحمن الرحيم، وبه نستعين .. هو أصلو يا جماعة الغناء والمعازف دى فيها قولان عشان كده أنا بفتكر إنو بى فرضنا جبايات على قصت الفنانين ديل أنحنا بنعمل على إرساء قواعد المشروع الحضارى بتاعنا وبنقلل من الفسوق والفجور والإنحلال.
- عندك لينا يا دكتور رؤية واضحة للمسألة دى ؟
- كيف ما عندى .. أولن بالتبادى أى فنان يقبض عليه متلبسا بالغناء فى بيت عرس أو سماية أو حتى طهور لازم يكون مرخص !!
- الجميع : كيفن يعنى؟
- مرخص الواااحدة دى ... يعنى يكون عندو رخصة ونمرة .. ح د .. ك م .. زى العربات بالضبط وده طبعن بعد ما يجتاز الفحص الآلى !!
- ممكن يا دكتور تشرح لينا كلامك ده.
- بسيطة .. نعمل لينا مكاتب ترخيص للفنانين ديل .. ويدخلو فحص عشان نتأكد من سلامة أى فنان ح يمشى يعمل حفلات مش ممكن يكون عندو سل لا قدر الله ويقوم يعادى العريس او الناس القاعدة فى الحفلة أو يكون عندو أنفلونزا الجنازير !!
- صوت : تقصد الخنازير يا دكتور !!
- الخنازير الجنازير المهم بس يدفعوا لينا حق الترخيص ، وكمان أى فنان فيهم ماشى حفلة لازم يملأ الفورم بتاع أ م خ أغنيات ملك خاص والفورم أ م غ أغنيات ملك الغير ويدفع الرسوم بتاعتهم.
- الجميع : الحتة دى يا دكتور ما فاهمينها؟
- أنا أشرح ليكم .. الفنانين الهسه ديل كووولهم عملو القروش دى عشان بغنو غنا الفنانين القدام وتلاقى الواحد فيهم سايق ليهو همر والفنان سيد الأغنية عجلة ما قادر يسوقا .. والشاعر العملا قاعد يتزاوغ من سيد الدكان والملحن بتاعا أكل البوش عمل ليهو أنيميا ... عشان كده أى فنان يغنى أغنية ما بتاعتو ح ندفعو على الأغنية الواحدة ميت ألف !! ولو الأغنية بتاعتو خمسين ألف !!
- وطيب لو ما إلتزم بالحكاية دى؟
- ما يلتزم كيف ؟ مش نحنا ح نعمل مباحث فنانين !!
مباحث الفنانين :
فى أحد الأقسام جلس مسئول مباحث الفنانين وامامه عدد من أفراد المباحث يلقى عليهم جدول مهام اليوم والذى صادف الخميس حيث تنتشر حفلات الأعراس والمناسبات :
- شوفوا يا جماعة فى نطاق القسم بتاعنا ده ح يكون فى سطاشر حفلة ولازم طبعن نغطيها كووولها ... أول حاجة عندكم حنان مس كول عندها سماية قدام نادى الأسرة وإنتو عارفين إنو حنان مس كول دى ما مرخصة وما عندها مسجات أقصد لوحات وكمان ما عندها أغنية واحدة بتاعتا ... وكمان عندكم عوض طرمبة عندو حفلة بتاعت عرس فى صالة الأفراح القدام ميدان المولد وبرضو ما مرخص .. و...
- أحد الأفراد : برضو يا سعادتك جاتنا معلومة إنو عوضية عضلات عندها الليلة حفلة بتاعت عرس فى صالة التيس الذهبى ..
- علوية عضلات دى أمشوا ليها لكن أعملو حسابكم الزولة دى خطيرة عشان كده شيلوا معاكم قوة أكبر.
- فرد : هسه الفنانين الما مرخصين ديل نرفعهم معانا طوالى فى البوكس؟
- البيدفع الغرامة خلوهو لكن الما بدفع أرفعوهو.
- غرامة عدم الترخيص بس جنابك ؟
- كل الغرامات .. غرامت عدم الترخيص وغرامت أ م غ وغرامت أ م خ !
- مفهوم جنابك.
الما قرينا :
على باب صالة الأفراح الفاخرة وقف أقرباء العريس يتلقون التهانى والتبريكات من الضيوف وهم يدخلون إلى مكان المناسبة بينما إمتلأت الكراسى الفاخرة بالداخل بالمعازيم وهو يرتدون أفخر ما لديهم من ثياب ويتعطرون بمختلف العطور الجميلة التى إنتشرت فى المكان ، بدأ السفرجية بملابسهم المميزة فى وضع أطباق الأكل والمشروبات الغازية وتوزيعها على الطاولات ثم صمتت الموسيقى الصاخبة التى كانت تنطلق من مكبرات الصوت التى إنتشرت فى أرجاء القاعة بينما خف المصورون إلى أخذ أماكنهم عند مدخل الصالة فى إنتظار دخول العروسين اللذين وصلا من الكوافير لتبدأ موسيقى زفة العروس وتمتلئ شاشات البلازما بصورة العروسين وهما ينزلان من العربة البيضاء الفاخرة تتبعهما الكاميرا حتى المدخل ومن ثم حتى الكوشة الأنيقة التى وضعت فى منتصف الصالة وسط زغاريد النساء ، قبل أن يصدح عوض طرمبة بالغناء.. وبينما كانت التجهيزات الأخيرة تجرى فوجئ شقيق العريس بشخص يقتحم المسرح فبادره قائلاً :
- إنتا يا زول تبع الفرقة دى؟
- فرقة شنو؟ أنا تبع المحلية.
- والمحلية دى دايرة مننا شنو؟ تصديق الحفلة وعملناهو..
- لا لا دى حاجة تانية.
وقام الموظف بشرح الأمر لشقيق العريس :
- شوف يا أستاذ المحلية قررت إنو أى حفلة يكون فيها مندوب منها.
- عشان شنو ؟ قريبة العريس مثلا؟
- لا .. الحكاية دى إنتو ما ليكم يا أستاذ دخل بيها ...
- كيفن ما لينا دخل؟ العرس ده بتاعنا وإلا بتاع المحلية؟
- العرس دا بتاعكم صاح لاكن نحنا بنجى تبع الفنان.
- لا دى أشرحها ليا.
- أيوااا .. الظاهر إنك ما متابع الأحداث.
- أحداث شنو؟
- فنانكم ده هسه مرخص؟ كدى هسه شوف قميصو ده فيهو رخصة مدورة؟
- عوض طرمبة متدخلاً : يا جماعة والله أنا قلت بس أمسك العداد بتاع الحفلة دى وبكرة أمشى أرخص !
- طيب كده عليك مخالفة ميتين وخمسين ألف ! مواصلاً أها وح تغنى كم أغنية فى الحفلة دى؟
- ح أغنى عشرة أغنيات.
- كم وااحده بتاعتك ؟
- اتنين.
- يعنى تمانية ما بتاعتك.
- أيوه
- طيب تمانية فى ميت ألف دى تمنمية أربعمية ... يكون المجموع ستمية وخمسين ألف زايد أغنيتين بتاعاتك الواحدة بى خمسين دى ميت ألف يكون المجموع تسعميت ألف جنيه.
لم يشأ شقيق العريس أن يفسد الحفل بأى إعتراض وهو يرى القوة التى معه بل طلب من موظف المحلية أن يمهله حتى نهاية الحفل لحل الإشكال فى ذات الوقت الذى أخذ فيه الفنان عوض طرمبة يتصبب عرقاً ..
- فى شنو ما خلاس أبدأ لينا الحفلة.
- فى شنو كيف يا استاذ ناس المحلية ديل عاوزين ليهم تسعميت ألف وإنتو أديتونى تمنيت ألف يعنى أغنى ليكم بالخسارة ! والله يا أستاذ القصة دى كده ما بتخارج .. عشان بتاع الأورغان ده عاوز وبتاع الحافلة الجابنا عاوز.
- والعمل؟
- ما فى طريقة إلا تزيدو لينا العداد ده شوية أوتدفعو إنتو حق المحلية !
حتى تنتهى المناسبة على خير ونسبة لضيق الوقت المتبقي فقد قام شقيق العريس بطمأنة الفنان عوض طرمبة بإنو ح يدفع رسوم مخالفة الترخيص إضافة إلى غرامة رسوم أغانى الغير كما أسماها موظف المحلية ! وعندئذ أمسك عوض طرمبة بالمايك وبدأ بأغنيته الخاصة التى يقول مطلعها :
وووب علينا الما قرينا وبالجبايات إنهرينا.
مخ وأعصاب :
إمتلأت الصالة بالمدعوين ، نصبت الساونات فى أركان الصيوان الكبير وجلس العروسان على الكوشة التى إزدانت بالأنوار الملونة والزهور ، أخذ عازف الأورج فى ضبط النغمات فى ذات الوقت الذى تقدمت فيه الفنانة عوضية عضلات تتبختر نحو المسرح وهى تتزين بغواىش ومشغولات ذهبية التى يمكن أن تفتح محل صياغة بررراحة وهى ترتدى ثوباً شفافاً يظهر من خلاله البودى الذى يخفى من تحته عضلات تبش والتى كانت سبب التسمية .. قبل أن تفتح عوضية عضلات فمها صادحة بالغناء تقدم نحوها شخص يرتدى بدلة سفارى بنية :
- لو سمحتى الرخصة بتاعتك؟
- رخصة شنو البشيلا معاى هنا .. الرخصة فى العربية برة مع السواق !
- لا انا بقصد رخصة الغناء !
- إنتا بتهظر .. هو الغناء عملو ليهو رخصة كمان؟!
- ما تعملى فيها مجنونة جيبى الرخصة بتاعتك وإلا أطلعى أركبى معانا فى البوكس البرة ده.
- فى تحدٍ : أركب معاك وين؟ بوكس شنو البركبو معاكم إنتو قايلنى ست شاى واللا بتكلم براى؟
- شوفى يا عوضية عضلات نحنا ما عاوزين معاكى كلام كتير .. يا الرخصة يا تدفعى الغرامة يا تسيبى الحفلة دى وتطلعى وتركبى معانا.
- وهى تعطى الإشارة لعازف الأورج الذى بدأ بالعزف:
ووووى دشكا ... دشكا دشكا دشكا
يا مباحث الفنانين
ووووى دشكا
إنتو ما عارفين
ووووى دشكا
أو تكونو ناسين
ووووى دشكا
عوضية عضلات
وووى دشكا
قاعدة تحى حفلات
ووووى دشكا
فيها صفقة ورقيص
ووووى دشكا
وكلو بدون ترخيص
ووووى دشكا
ثم تلتفت لبتاع المباحث وتوجه له لكمة خطافية ينقل بعدها إلى مستشفى المخ والأعصاب